საკმაოდ გამოცდილმა ესპანელმა არბიტრმა, მატეო ლაოსმა მსოფლიოს ჩემპიონატზე მუშაობა სკანდალურად დაასრულა - ის მუნდიალიდან მოკვეთეს, მიზეზი კი არგენტინისა და ნიდერლანდების მატჩი გახლავთ, რომელიც სწორედ ლაოსმა განსაჯა.
მატეო ლაოსმა აღნიშნულ შეხვედრაში რეკორდულად ბევრი, 17 ყვითელი ბარათი ამოიღო. გარდა ამისა, ესპანელმა რეფერიმ არაერთი საკამათო გადაწყვეტილებაც მიიღო, რის გამოც როგორც არგენტინელთა, ისე ნიდერლანდელთა გულისწყრომა გამოიწვია.
მატჩის შემდეგ, მატეო ლაოსი ბევრმა ფეხბურთელმა გააკრიტიკა, მათ შორის ლიონელ მესიმაც, რომელიც ლაოსს აქამდეც არაერთხელ შეხვედრია. სხვათაშორის, FIFA-მ ლაოსის საკითხთან დაკავშირებით, გამოძიებაც კი დაიწყო.
რაც შეეხება იმ მსაჯებს, რომლებიც ამავე 1/4 ფინალური შეხვედრისას ლაოსს ეხმარებოდნენ, ისინი მუნდიალზე დარჩებიან.