"ჩემი ნაკრებით ამაყი ვარ, მაგრამ ეს ფაქტი არ მასვენებს..", - გველესიანის ვრცელი მიმართვა

საქართველოს საფეხბურთო ნაკრების და ირანული პერსეპოლისის მცველმა გიორგი გველესიანმა სოციალურ ქსელში ვრცელი პოსტი გამოაქვეყნა, სადაც ევრო 2024-ზე ნაკრების გამოსვლა შეაფასა და ყურადღება ბოლო, ესპანეთთან წაგებულ შეხვედრაზე გაამახვილა.

"ვამაყობ რომ ქართველი ვარ!

რთულია,გადმოგცეთ ჩემი გაორებული შეგრძნებები. ერთის მხრივ, ვარ ამაყი, რომ წარმოვადგენ იმ ნაკრებს,რომელმაც ასე ღირსეულად წარმოაჩინა თავი, ამ უდიდეს ასპარეზზე,თითქოს შეუძლებელი შესძლო,თითქოს, ამ დაუღალავმა 33 წლიანი წყურვილმა და მოლოდინმა სიხარულისა,ერთიანობისა და სიამაყისა, ერთიანად ამოხეთქა და მოიცვა მთელი ერი. ვისაც ოდესმე ვიცნობდი,ვისაც ოდესმე შევხევდრილვარ, ან და ვისთვისაც, თუნდაც ერთხელ ხელი ჩამომირთვამს,ყველა გახარებული და გაბრწყინებული თვალებით ვნახე.
ეს დაუვიწყარი შეგრძნებებია.

მეორეს მხრივ,რაღაც არ მასვენებს,ვიცი რომ მსოფლიოში საუკეთესოები იყვნენ,ვიცი რომ თითქმის უნაკლოდ დაბალანსებულ გუნდს შევხდით,რომელთა წინააღმდეგ “ბურთი მრგვალი” არავისთვისაა,რომელთა წინააღმდეგ არცერთი შეცდომის დაშვების უფლება არ გაქვს. თუმცა,ესეთ მონსტრთან დავწინაურდით,გაჩნდა შეგრძნება,რომ ჩვენ ამასაც შევძლებთ. მთელი პირველი ტაიმი თავს შეუპოვრად ვიცავდით,ისინი კი აგრძელებდნენ,წყნარად მშვიდად და ორგანიზებულად, ყველა მხრიდან შეტევებს,საბოლოოდ ეს უპირატესობა მათ გოლებში და გამარჯვებაში გადაიზარდა. ბევრს ვფიქრობ და მაქვს დაუმკაყოფილებლობის შეგრძნება,ალბათ ისე როგორც ყველა ჩვენგანს, მაგრამ,რაც უფრო დრო გადის,მით უფრო ვხვდები, რომ ფეხბურთში საბოლოოდ კანონზომიერება ყველაფერს თავის ადგილს უჩენს.

მადლობა ქართველ გულშემატკივარს, ნამდვილად გამორჩეულები იყავით. ემოციურებიც,კულტურულებიც,ერთიანებიც,ლამაზებიც და ენერგიულებიც. ეს თქვენი დიდი გამარჯვებაა!", - წერს გველესიანი სოციალურ ქსელში.

ცნობისთვის, 33 წლის მცველმა ეროვნულ ნაკრებში სადებიუტო შეხვედრა სწორედ ვილი სანიოლის მეთაურობით გამართა.