"უცხო ქვეყანაში ჩვენი დროშის დანახვა დიდ ენერგიას გვაძლევს" - ლობჟანიძე იტალიასთან მატჩის შემდეგ

დღეს საქართველოს მორაგბეთა ნაკრები გენუაში, იტალიის ნაკრებთან, 2024 წლის რაგბის შემოდგომის მორიგი ტესტ მატჩი გამართა და 17:20 დამარცხდა.

ნამატჩევს, La Gazzetta dello Sport Georgia-სთან ისაუბრა ჩვენი გუნდის კაპიტანმა, ვასკა ლობჟანიძემ.

"კარგი პირველი ტაიმი გამოგვივიდა, კარგი ლელოები გავიტანეთ. მეორე ნახევარში ბევრი შეცდომა დავუშვით დაცვაში, ბევრი ჯარიმა ავიღეთ, რამაც იტალიას თამაშში დარჩენის შანსი მისცა.

იტალია დიდი გუნდი და სწორედ გამოცდილებით მოგვიგეს. ბოლომდე ვიბრძოლეთ, რაც შეგვეძლო ყველაფერი გავაკეთეთ მოსაგებად, უბრალოდ გამოცდილებამ გაიმარჯვა. იმედი მაქვს რომ რამდენიმე წელში შევძლებთ კიდევ უფრო განვითარებას და ასეთი მატჩების მოგებას.

რაც შეეხება გულშემატკივარს, ძალიან დიდი მადლობა მინდა ვუთხრა ქართველებს აქ მოსვლისთვის. უცხო ქვეყანაში ქართველი ქომაგის ყოფნა სტადიონზე და საქართველოს დროშის დანახვა ჩვენთვის ძალიან დიდი სტიმულია და დიდ ენერგიას გვაძლევს, მადლობა ყველას. 24 ნოემბერს თბილისში ვთამაშობთ და მინდა ყველას მოვუწოდო, რომ მოვიდნენ სტადიონზე და იმედი გვაქვს ძალიან კარგად ვითამაშებთ"


- ამბობს ქართველი მორაგბე.

მორიგ მატჩს საქართველოს მორაგბეთა ეროვნულო ნაკრები 24 ნოემბერს, მიხეილ მესხზე ტონგას წინააღმდეგ გამართავს.