უდიდესი ცდუნება ოსიმენს - ალ ჰილალმა ნიგერიელს წარმოუდგენელი ხელფასი შესთავაზა

ვიქტორ ოსიმენის მომავალი საფეხბურთო სამყაროში აქტიური განხილვის საგანია. ნიგერიელი თავდამსხმელი, რომელიც ამჟამად „გალათასარაიში“ იჯარით ასპარეზობს, „ნაპოლის“ საკუთრებაშია და მისი ტრანსფერის გარშემო არაერთი სპეკულაცია ვრცელდება.

იტალიური კლუბების მიღმა ოსიმენის გამოსასყიდი თანხა 75 მილიონ ევროს შეადგენს. მიუხედავად ამისა, მისით „იუვენტუსიც“ ინტერესდება, თუმცა პარალელურად მუშაობს ვიქტორ დიოკერეშის ტრანსფერზეც, რომელიც ლისაბონის „სპორტინგში“ თამაშობს.

ოსიმენს ევროპის დატოვება არ სურს, თუმცა საქმე მხოლოდ სურვილებში არ არის. საუდის არაბეთის გრანდმა, „ალ ჰილალმა“, ფეხბურთელს სოლიდური წინადადება შესთავაზა — სამწლიანი კონტრაქტი და ამ პერიოდში ჯამში 120 მილიონი ევრო. ასეთი შეთავაზება ნებისმიერი ფეხბურთელისთვის რთული ასარიდებელია.

გავრცელებული ინფორმაციით, „ალ ჰილალი“ აჩქარებს ტრანსფერს, რათა ოსიმენი სწრაფად შეუერთდეს გუნდს და მოასწროს შეთამაშება თანაგუნდელებთან. კლუბს სურს, რომ ნიგერიელი მსოფლიო საკლუბო ჩემპიონატზე, 18 ივნისს, უკვე მზად იყოს მადრიდის „რეალთან“ დაპირისპირებისთვის.

დარჩენილია მთავარი კითხვა: აირჩევს თუ არა ოსიმენი ფინანსურ სტაბილურობას და დიდი ფულის გზას, თუ დარჩება ევროპულ ფეხბურთში და კარიერის განვითარებას ტრადიციულ გზას გაუყვება? პასუხი ამ დილემაზე შესაძლოა უახლოეს დღეებში გახდეს ცნობილი.