VIDEO: აკრძალული მოძრაობა? - კვარაცხელიას პენალტი მეკარემ გააპროტესტა

10 აგვისტოს ნაპოლიმ 2024/2025 წლების სეზონი ოფიციალურად დაიწყო. ანტონიო კონტეს გუნდი იტალიის თასის 1/32-ფინალში ქვედალიგელ მოდენას შეხვდა და საკმაოდ მძიმე ორთაბრძოლის გადატანა მოუხდა.

მატჩის ძირითადი 90 წუთის უგოლოდ ამოწურვის შემდეგ პირდაპირ პენალტების სერია დაინიშნა, რომელიც ნაპოლიმ მეტოქეს 4:3 მოუგო, არადა, თავიდან ჩამორჩენაში სწორედ ნეაპოლელები იყვნენ.

ნაპოლის მე-4 და შესაბამისად, გამარჯვების პენალტი ხვიჩა კვარაცხელიამ საკმაოდ მაღალ დონეზე შეასრულა. ხვიჩამ დარტყმის პროცესში პაუზა ისე აიღო, რომ მსაჯს პრეტენზიები არ გასჩენოდა, შემდეგ კი მეკარე მოძრაობაზე დაიჭირა და მისგან შორეულ კუთხეში ბურთი მშვიდად შეაგორა.

აღსანიშნავია, რომ ამ პენალტის გაშვებამ მოდენას მეკარე, რიკარდო განიო ძალიან გააღიზიანა, რომელმაც ბურთის საკუთარ ბადეში მიღების შემდეგ კვარას თერთმეტმეტრიანი უმალვე გააპროტესტა, თუმცა არბიტრებს პენალტის გამართულობაზე არანირი პრობლემა არ ჰქონიათ და ხვიჩას ხელახლა მისი შესრულება აღარ მოუწია.

იხილეთ ვიდეო