ლაურენტისმა შემცვლელი უკვე იპოვა - დიდი ალბათობით კონტე ნაპოლის დატოვებს

იტალიის სერია A-ს მიმდინარე სეზონი დასასრულს უახლოვდება და ხვიჩა კვარაცხელიას ყოფილ კლუბ „ნაპოლის“ ჩემპიონობისთვის მხოლოდ ერთი ნაბიჯი აშორებს. 23 მაისს გუნდი საკუთარ მოედანზე „კალიარის“ მიიღებს, და გამარჯვების შემთხვევაში, მორიგ სკუდეტოს მოიპოვებს. ქაღალდზე ეს ამოცანა რთული არ უნდა იყოს, თუმცა ფეხბურთი ყოველთვის სიურპრიზებით არის სავსე.

მიუხედავად ამ წარმატების წინაპირობებისა, იტალიური მედია სულ უფრო აქტიურად საუბრობს იმაზე, რომ სეზონის დასრულების შემდეგ „ნაპოლის“ მთავარი მწვრთნელი ანტონიო კონტე შესაძლოა გუნდს დაემშვიდობოს. ცნობების თანახმად, კლუბის პრეზიდენტი აურელიო დე ლაურენტისი უკვე მუშაობს ახალ მწვრთნელზე.

რამდენიმე წყაროს ინფორმაციით, ახალი დამრიგებლის რანგში მასიმილიანო ალეგრი განიხილება — ყოფილი ტურინის „იუვენტუსის“ ხელმძღვანელი. ითქვა, რომ დე ლაურენტისი მას რომში, ჩოგბურთის საერთაშორისო ტურნირის მიმდინარეობისას შეხვდა, სადაც მათ სამომავლო თანამშრომლობაზე ისაუბრეს.

ალეგრი ამ ეტაპზე დასვენების რეჟიმში იმყოფება, თუმცა მისი მხრიდან „ნაპოლიში“ გადასვლაზე თანხმობა თითქოს უკვე მიღებულია. ეს გადაადგილება უდავოდ მნიშვნელოვანი ცვლილება იქნება როგორც გუნდისთვის, ასევე იტალიური ფეხბურთისთვის.

რაც შეეხება ანტონიო კონტეს, არსებობს ვარაუდი, რომ მისი მომდევნო მისამართი შესაძლოა ისევ ტურინი გახდეს – კონკრეტულად კი „იუვენტუსი“, რომელთანაც მას წარმატებული წარსული აკავშირებს.