დღეს მამარდა და კვარა თამაშობენ - ნახეთ რომელს რა მიზანი აქვს

დღეს, საქართველოს ეროვნული ნაკრების ორი გამორჩეული ფეხბურთელი, ხვიჩა კვარაცხელია და გიორგი მამარდაშვილი ითამაშებს, მიზანი კი მათ გუნდებს განსხვავებული აქვთ.

კვარას პსჟ უკვე ჩემპიონია და გუნდზე ყველანაირი წნეხი მოხსნილია. 22:45-ზე პარიზელები ნანტის წინააღმდეგ გასვლაზე ითამაშებენ და მორიგი გამარჯვების მოპოვებას შეეცდებიან. ლუის ენრიკეს გუნდის მთავარი გამოწვევა ჩემპიონთა ლიგა და არსენალია, რომლამდეც პსჟ-ს ლიგა 1-ში ორი შეხვედრის გამართვა მოუწევს, მათ შორის ერთ-ერთი კი დღეს შედგება. სავარაუდოდ, ნანტის წინააღმდეგ ენრიკე თამაშში გარკვეულ ცვლილებებს შეიტანს, რაც პარი სენ-ჟერმენს შემდგომში არსენალის წინააღმდეგ უნდა გამოადგეს.

გიორგი მამარდაშვილის ვალენსია ლა ლიგაში მე-14 ადგილზეა და გასავარდნ ზონას 7 ქულით უსწრებს, კონფერენს ლიგის პოზიციამდე კი 'ღამურებს' 5 ქულა აშორებთ. ვალენსია ესპანიოლს 21:00 საათზე დაუხვდება და 7-მატჩიანი წაუგებელი სერიის კიდევ უფრო გახანგრძლივებას შეეცდება. ლა ლიგის დასრულებამდე 6 ტურია დარჩენილი და მამარდაშვილის გუნდი დაზღვეული ჯერ არაფრისგან არ არის. ამდენად, დღეს ვალენსიელები მინდორზე მოტივაციის ნაკლებობით ნამდვილად არ გავლენ.