19 ნოემბერს კარდიფში, „ფრინციფალითიზე“ უელსთან ისტორიულ გამარჯვებაში ქართულმა შერკინებამ უდიდესი როლი ითამაშა. შეიძლება ითქვას, რომ შერკინება იყო გარდამტეხი, მთავარი გასაღები იმ მომენტში, როდესაც შეხვედრის დასრულებამდე ტაბლო რამდენიმე წუთს ითვლიდა.
ბოლო დროს საქართველოს შერკინება არ იყო ისეთი მტკიცე, როგორიც წინა წლებში, მაგრამ კარდიფში, დასკვნით 5 წუთში მან სრულად დაიბრუნა ძველი დიდება, უელსი მისსავე შერკინებაში ორჯერ დააჯარიმა და პირველს, ლუკა მატკავას მიერ 42 მეტრიდან გატანილი ჯარიმა მოყვა, რომელმაც ანგარიშში დაწინაურების შესაძლებლობა მოგვცა, ხოლო მეორეთი მეტოქეს ბურთი ჩამოვართვით და ისტორიული გამარჯვება ქართული სპორტის ახალ თავში ჩავწერეთ.
შერკინებაზე, უელსთან მატჩზე და ალექსანდრე ქუთელიას ბრწყინვალე შემოსვლაზე კომენტარი ილია სულამანიძემ გააკეთა, რომელმაც განაცხადა.
"ის იყო უმნიშვნელოვანესი გამარჯვება არა მხოლოდ ნაკრებისთვის, არამედ ქვეყნისთვის, გულშემატკივრისთვის და მთლიანად ქართული რაგბისთვის. დარწმუნებული ვარ ეს გამარჯვება მთელს ქართულ რაგბს დამატებით მუხტს და სტიმულს მისცემს, ახალ სიმაღლეზე აგვიყვანს. ჯერ კიდევ ზაფხულში, იტალიასთან გამარჯვებამ როგორც ბიჭებს, ასევე სამწვრთნელო შტაბს უდიდესი თავდაჯერებულობა მოგვცა. ეს დინამიკა „ფრინციფალითიზე“ გაგრძელდა და რა თქმა უნდა ჩვენი თავდაჯერებულობა კიდევ უფრო გაიზარდა. გახარებულები ვართ, მაგრამ არ უნდა გავჩერდეთ და წინ უნდა ვიაროთ. სწორი დაგეგმვით, პროფესიონალიზმით, თავდადებით, შრომით და ცოდნით, დარწმუნებული ვარ კიდევ უფრო მეტს მივაღწევთ."