გიორგი ჩიხრაძე: "ჩვენს ნაკრებს ევროპაზე ერთი დიდი პლიუსი აქვს"

„შემადგენლობა წინასწარ რომ არის ცნობილი, შეთამაშების მხრივ ძალიან კარგია, მაგრამ, შესაძლოა, სანიოლმა სიუპრიზი ვერ მოუმზადოს მეტოქეს, რომელსაც ეს 11 ფეხბურთელი კარგად ეყოლება შესწავლილი“

„რა თქმა უნდა, ეს გასათვალისწინებელია, რომ მეტოქე სწავლობს ჩვენს ნაკრებს და ფეხბურთელებს, მათ თამაშს, შესაძლებლობებს, მოქმედებებს და ურთიერთმოქმედებას. ეს გასაგებია.

"თუმცა მეორე მხარეა – ჩვენი გუნდი ხშირად რომ ცვლიდეს ტაქტიკას ან შემადგენლობას, ეს სხვა შემთხვევა იქნებოდა, მაგრამ ნაკრები ჩამოყალიბებულია შემადგენლობით და თამაშით, რამაც შედეგი მოგვიტანა. არა მგონია, რომ დიდი ცვლილება მოხდეს – ღმერთმა ქნას, რომ ყველა ჯანმრთელად იყოს.

მნიშვნელოვან თამაშებში, სადაც შედეგი გვჭირდებოდა და ერთ ბურთსაც ძალიან დიდი მნიშვნელობა ჰქონდა, ჩვენმა ნაკრებმა მიზანს მიაღწია. ამიტომ მიმაჩნია, რომ სანიოლი შედეგზე ითამაშებს და, შესაბამისად, დიდი ცვლილებები არც თამაშში იქნება და არც შემადგენლობაში.

მოწინააღმდეგეს ჩვენი ნაკრები ისედაც ეყოლება შესწავლილი. მთავარია, ჩვენ როგორ ვითამაშებთ და ფეხბურთელები მათ წინაშე დასმულ ამოცანებს თუ შეასრულებენ. თქვენ რაც თქვით, ეს გასათვალისწინებელია, მაგრამ შეთამაშებული შემადგენლობა და ათვისებული ტაქტიკა დიდი უპირატესობაა“.