შემოგვიერთდით

"იმედი გვაქვს სტადიონი სავსე იქნება" - მაისაშვილი და შარიქაძე ურუგვაისთან მატჩის წინ

6-11-2022, 11:30

Aa Aa

გაზიარება:

დღეს საქართველოს ეროვნული ნაკრები ნოემბრის ტესტის პირველ მატჩს ურუგვაის წინააღმდეგ, დინამო არენაზე გამართავს.

შეხვედრამდე რამდენიმე საათით ადრე "ბორჯღალოსნების" დამრიგებელმა, ლევან მაისაშვილმა და ნაკრების კაპიტანმა, მერაბ შარიქაძემ პრესკონფერენცია გამართეს, სადაც მოსამზადებელ პერიოდზე და გუნდში არსებულ სიტუაციაზე ისაუბრებს.

მერაბ შარიქაძე - "მოსამზადებელი პერიოდი მაქსიმალურად ეფექტურად გამოვიყენეთ, რაშიც დიდი როლი ითამაშა განახლებულმა ბაზამ, მოედნის შეცვლილმა საფარმა და გაუმჯობესებულმა პირობებმა. ამაყი ვარ, რომ ბორჯღალოსნებს მე-40 მატჩში ვუკაპიტნებ. ცოტა არ მჯერა კიდეც, თუმცა რამდენი ციფრიც ემატება ჩემს კაპიტნობას, იმდენად იზრდება პასუხისმგებლობაც. იმედი მაქვს, ამ პასუხისმგებლობას თავს ბოლომდე გავართმევ.

ურუგვაიზე 2019 წლის თამაშით ნუ ვიმსჯელებთ. მაშინ მათ ფიჯისთან მოგების შემდეგ, სულ 4 დღე ჰქონდათ აღდგენისთვის, რაც ძალიან მცირე დროა და თან, არც შემადგენლობაში განუხორციელებიათ როტაცია. ეს არის გუნდი, რომელმაც ბოლო წლებში ძალიან დიდი პროგრესი განიცადა, სხვანაირად ფიჯის ვერ მოუგებდა. გარდა ამისა, თამაშობენ ფანტასტიკურ ჩემპიონატს – ამერიკის სუპერთასს, რომელშიც „შავი ლომიც“ მიიღებს მონაწილეობას. ნებისმიერ შემთხვევაში, ძალიან რთული თამაშისთვის ვემზადებით.

პრემია თუ იქნება? (იცინის) ჩვენ ამაზე არც ვფიქრობთ. იტალიასთან გამარჯვების შემდეგ, დიდი მოლოდინი გვაქვს გულშემატკივრისგან და იმედი გვაქვს ხვალ სტადიონი სავსე იქნება. თუ სტადიონი არ გაივსო, გამოდის რომ გულშემატკივრის მოლოდინი არც ისე დიდი ყოფილა. არის 10 და 20- ლარიანი ბილეთები და იმედია, მინიმუმ ეს ადგილები ბოლომდე შეივსება."

ლევან მაისაშვილი - „გვყავს ტრავმირებულები, რაც თანმდევი პროცესია და ამის გამო შემადგენლობაში გარკვეული როტაცია მოგვიწია. რამდენიმე მოთამაშის საქმეში ხილვა თავადაც გვსურდა. პირველ თამაშზე ხშირად გვაქვს ხოლმე შეთამაშების პრობლემა. ვეცდებით, ეს სტერეოტიპი დავანგრიოთ და მაყურებელს ის თამაში ვაჩვენოთ, რისთვისაც ვემზადებით.

ბექა გიგაშვილი დღე-დღეზე ბავშვს ელოდება და ეს მომენტი აუცილებლად უნდა გაგვეთვალისწინებინა. ტრავმა აქვს ჯაფარიძეს. გიორგი მელიქიძე წინა პერიოდში ორჯერ გამოვიძახეთ და ჩემდა სამწუხაროდ, ჩამოსვლაზე ორივეჯერ უარი გვითხრა. პირველ შემთხვევაში მიზეზად ოჯახური პრობლემები დასახელდა და ეს ჩემთვის გასაგები იყო, მეორე ჯერზე კი მიზეზი ვერ გავიგე, საქართველოს ნაკრები კი ის ადგილი არ არის, სადაც შეიძლება ვინმეს თამაში ვაიძულოთ.

არსებული რესურსიდან გამომდინარე, ურუგვაისთან თამაშს ოპტიმალური შემადგენლობით ვიწყებთ. ჩვენთვის სამივე თამაში მნიშვნელოვანია. ნოემბრის კალენდარი და მეტოქეები ძალიან ჰგავს 2023 წლის მსოფლიო თასის მოცემულობას. ეტაპზე არც მწვრთნელები და არც მოთამაშეები, არ ვფიქრობთ სამოასა და უელსთან მატჩზე და სრულად ვართ კონცენტრირებული ურუგვაიზე."