ბორჯღალოსნების მთავარმა მწვრთნელმა ლევან მაისაშვილმა, კაპიტანმა მერაბ შარიქაძემ და დავით ნინიაშვილმა, უელსთან 7 ოქტომბერს გასამართი მატჩის წინ პრესკონფერენცია გამართეს.
2023 წლის მსოფლიო თასის ჯგუფური ეტაპის დასკვნითი თამაში ნანტში, სტად დე ლა ბოჟუაზე საქართველოს დროით 17 საათზე დაიწყება.
ლევან მაისაშვილი : "სამ მოთამაშეს ქირურგიული ჩარევა დასჭირდა და ოპერაციებმა წარმატებით ჩაიარა. ტრავმა სპორტის თანმდევი ნაწილია, რომელმაც, სამწუხაროდ, ძალიან დაგვაზიანა. განსაკუთრებით მძიმე იყო ფიჯისთან მატჩის დასაწყისში მიღებული ორი ტრავმა (თენგიზ ზამთარაძე და ლაშა ჯაიანი), რის გამოც ნაადრევად მოგვიწია შეცვლები და ამან მეორე ტაიმში ტაქტიკური ცვლილებების განხორციელების შესაძლებლობა არ მოგვცა.
მიუხედავად იმისა რომ ტრავმების გამო ბევრი მოთამაშე მოვისაკლისეთ, მნიშვნელოვანია ის სისტემა და ერთიანობა, რომლითაც ვთამაშობთ. მოედანზე გასული თითოეული მოთამაშე მაქსიმალურად დაიხარჯება, დანარჩენი კი შაბათს გამოჩნდება.
შარშან იტალიასთან და უელსთან გამარჯვებებით თამასა გაცილებით მაღლა ავწიეთ. გულშემატკივარმა ეს თამასა ორჯერ უფრო აწია, რაც გასაგებია. ახლა უელსს სხვა მწვრთნელი ყავს, მან მსოფლიო თასისთვის მზადება ყველაზე ადრე დაიწყო და დაახლოებით 4-5 თვეა ერთად გაატარეს. ყველა მოთამაშეს კარგად ესმის სათამაშო გეგმა და ის შემთხვევით არ იკავებს ჯგუფში პირველ ადგილს."