მსოფლიო ჩემპიონატზე საქართველოს ეროვნულმა ნაკრებმა პირველი მარცხი იგემა - ბორჯღალოსნები ავსტრალიასთან 15-35 დამარცხდნენ.
შეხვედრის შემდეგ კმაყოფილი იყო ავსტრალიელების მთავარი მწვრთნელი ედი ჯონსი. მისი თქმით, თავისი მორაგბეებისგან ის მიიღო, რისი მიღებაც სურდა:
"ბონუს-ქულა მოვიპოვეთ და ეს სწორედ ის იყო, რაც გვსურდა. საქართველოსთან პირველად არ მქონია შეხება და პირველად მოხდა, რომ შერკინებაში დომინანტები ისინი არ ყოფილან. მადლობას ვუხდი შერკინების მწვრთნელს გაწეული სამუშაოსთვის, რაც დღევანდელ შეხვედრაში აისახა კიდეც.
კვირიდან კვირამდე უნდა გავუმჯობესდეთ. მეორე ტაიმი საუკეთესო დონეზე არ ჩაგვიტარებია, მაგრამ, რაც მთავარია, მოვიგეთ და მეტოქეს ქულების დაგროვების საშუალება არ მივეცით", - განაცხადა ჯონსმა.
ავსტრალიის გარდა საქართველოს ჯგუფში უელსი, ფიჯი და პორტუგალია არიან.