"საქართველოდან რომ დამირეკეს, ტელეფონი გავთიშე" - მამადუ სახო ეროვნულ ლიგაში ტრანსფერზე

ქუთაისის "ტორპედოს" 35 წლის ცენტრალურმა მცველმა, მამადუ სახომ, საქართველოში გადმოსვლაზე და ამასთან დაკავშირებით მის ფიქრებზე ისაუბრა.

"საქართველოში ახალგაზრდა ფეხბურთელებისთვის შესანიშნავი პროექტები ხორციელდება და ფეხბურთში მნიშვნელოვანი ინვესტიციები იხარჯება. ამის შედეგი უკვე ვიხილეთ: საქართველოს ეროვნული ნაკრები ევროპის ჩემპიონატზე გავიდა, ხოლო ქართველმა მოთამაშეებმა შესანიშნავი თამაში აჩვენეს.

როდესაც პირველად დამიკავშირდნენ საქართველოდან, ვუთხარი, რომ იქ თამაში არ მაინტერესებდა და ზარი გავთიშე. ჩემმა მეუღლემ მკითხა, ვინ იყო ზარის უკან. ვუპასუხე, რომ საქართველოდან მირეკავდნენ და თამაშის შესაძლებლობას მთავაზობდნენ. ამის შემდეგ მან ტელეფონში დაიწყო ამ ქვეყნის შესახებ ინფორმაციის ძებნა და აღნიშნა, რომ საქართველოს ზღვა ჰქონდა.

მეორე დღეს საქართველოდან ისევ დამიკავშირდნენ. ამჯერად მათ ვუთხარი, რომ ჩემი მეუღლე გეგმავდა ერთი კვირით საქართველოში წასვლას, რათა ბავშვებისთვის შესაფერისი სკოლა მოეძებნა. კვირის შემდეგ ის დაბრუნდა და მითხრა, რომ იქაური სკოლები საოცარი იყო — ევროპული და ამერიკული სტანდარტების. გარდა ამისა, ქვეყანას ჰქონდა ზღვაც და სათხილამურო ტრასებიც. საქართველომ მასზე დიდი შთაბეჭდილება მოახდინა.

ჩემს ასაკში ოჯახი უმთავრესი პრიორიტეტია. არავის სურს ისეთ ადგილას წასვლა, სადაც მისი ოჯახი თავს კომფორტულად ვერ იგრძნობს."

- აღნიშნა ვეტერანმა მოთამაშემ.