წყალტუბოს "სამგურალმა" უზბეკურ გუნდთან ფრედ ითამაშა | მოსამზადებელი შეკრება

წყალტუბოს "სამგურალი" თურქულ შეკრებაზე ჯერაც დაუმარცხებელია. იტალიელი სპეციალისტის როდოლფო ვანოლის გაწვრთნილმა გუნდმა დღეს ანტალიაში მესამე საკონტროლო მატჩი გამართა.

გუნდის მეტოქე უზბეკეთის უმაღლესი ლიგის მეორეადგილოსანი "ოლმალიკი" გახლდათ. შეხვედრა ფრედ 2:2 დასრულდა.

შეხვედრა წყალტუბოელებისთვის კარგად დაიწყო. "სამგურალი" მატჩის დებიუტშივე დაწინაურდა. ლაშა შერგელაშვილმა დიდებულად შეასრულა კუთხური და ირაკლი ჯანჯღავამაც ერთი შეხებით, ეფექტური დარტყმით გახსნა ანგარიში 1:0.

გაშვებული გოლის შემდეგ უზბეკები ბურთს დაეუფლნენ, მაგრამ წყალტუბოელები დაცვაში ყურადღებით თამაშობდნენ და მეტოქეს რეალური მომენტი არ ჰქონიათ.

"სამგურალს" კი ანგარიშის გაზრდა შეეძლო, თუმცა შერგელაშვილის საჯარიმო დარტყმა ,,ოლმალიკის" მეკარემ მოიგერია.

წყალტუბოელებმა ცოტა ხანში მაინც მოახერხეს ანგარიშის გაზრდა და ეს ლამაზი შეტევით შეძლეს, საკუთარი საჯარიმოდან სწრაფად ამოტანლი ბურთი ბოლო ფაზაში ლუკა ხორხელთან აღმოჩნდა, რომელმაც მცველების გარემოცვაში მყოფ გიორგი ფანცულაიას დაუგდო და წყალტუბოელმა ფორვარდმაც უზადოდ დაარტყა - 2:0

უზბეკებმა ანგარიშის გათანაბრება გასახდელში გასვლამდე შეძლეს. ჯერ დაცვის შეუთანხმებლობით ისარგებლეს, შემდეგ კი პენალტი დაარტყეს, ყალიცავამ ბურთი კი მოიგერია, მაგრამ უზბეკებმა დამატებაზე გაიტანეს 2:2

მეორე ტაიმში როდოლფო ვანოლიმ ცვლილებებს მიმართა, თამაშში ბევრი ახალგზარდა ფეხბურთელი ჩაერთო. შეხვედრაც თანაბარ ბრძოლაში გაგრძელდა და საბოლოოდ ყაიმით დასრულდა.

სამგურალი: ყალიჩავა, პატარკაციშვილი, აბულაძე, დილანი, ჯანჯღავა, ვინისიუსი, ლ.ხორხელი, ჟანი, ახვლედიანი, შერგელაშვილი, ფანცულაია
შეცვლაზე შევიდნენ: ბელოვი, ქარიმოვი, ალი, წულაია, ჯეფინიო, ბული, იაშვილი, გოლეთიანი, მუჯირი, გაფრინდაშვილი

მთავარი მწვრთნელი: როდოლფო ვანოლი

- ვკითხულობთ წყალტუბოს "სამგურალის" პრეს-სამსახურის მიერ გავრცელებულ ტექსტში.