შემოგვიერთდით

ევრო 2024-ზე ვილი სანიოლის სამწვრთნელო შტაბს რამაზ სვანაძე შეუერთდება!

25-05-2024, 17:30

Aa Aa

გაზიარება:

საქართველოს 21-წლამდელთა ნაკრების მთავარი მწვრთნელი რამაზ სვანაძე და ფიზმომზადების სპეციალისტი ბონდო გოცირიძე ევროპის ჩემპიონატის მოსამზადებელ ეტაპზე ეროვნულ ნაკრებს შეუერთდებიან – ინფორმაციას ფეხბურთის ფედერაციის პრესსამსახური ავრცელებს.

მანამდე სვანაძე და გოცირიძე საქართველოს 21-წლამდე ნაკრებს ყაზახეთის ახალგაზრდულ ნაკრებთან საერთაშორისო ამხანაგური მატჩისთვის მოამზადებენ, რომელიც მიხეილ მესხის სახელობის სტადიონზე 6 ივნისს გაიმართება.

„რამაზ სვანაძე და მისი სამწვრთნელო შტაბის წევრი ბონდო გოცირიძე ეროვნული გუნდის მოსამზადებელ პროცესში 2022 წელს, ერთა ლიგის მატჩების პერიოდშიც მონაწილეობდნენ – ვფიქრობთ, რომ ეს პრაქტიკა ევროპის ჩემპიონატზე ვილი სანიოლის სამწვრთნელო შტაბსაც გააძლიერებს."- განაცხადა ფეხბურთის ფედერაციის ვიცე-პრეზიდენტმა, ალექსანდრე იაშვილმა.