ჩელენჯ თასი | დებიუტანტებით წლის პირველ მატჩში

‘შავი ლომი’ 2024 წლის პირველ მატჩს დებიუტანტებით ხვდება. ალექსანდრე ჯიღაური გუნდის კვართს პირველად მოირგებს, ტრავმიდან დაბრუნებულ თენგიზ ზამთარაძეს და ნიკოლოზ ხატიაშვილს კი დებიუტი ჩელენჯ თასზე ექნებათ.

მესამე რაუნდში ჩვენი გუნდი ‘კასტრს’ საფრანგეთში, „პიერ ფაბრეზე“ 19:15 საათზე ერკინება და გამარჯვების, გნებავთ ბონუს-ქულის აღების შემთხვევაში ფლეი ოფს მიუახლოვდება. ნებისმიერ შემთხვევაში, ფლეი ოფის საგზურის მოპოვების თვალსაზრისით გადამწყვეტი ბოლო ტური იქნება, რომელშიც ‘შავი ლომი’ 20 იანვარს ფრანგულ ‘კლერმონს’ „მიხეილ მესხზე“ დაუპირისპირდება.

ტრავმიდან ორი დაბრუნდა

‘შავი ლომის’ სამწვრთნელო შტაბმა უკვე დაასახელა ის შემადგენლობა, რომელიც 13 იანვარს ‘კასტრის’ წინააღმდეგ ითამაშებს. მცირე ტრავმის გამო განაცხადში არ არიან ლუკა ივანიშვილი და თენგიზ პერანიძე, „ძველი ტრავმებიდან“ კი ორი მოთამაშე დაბრუნდა – ილია სპანდერაშვილი და თენგიზ ზამთარაძე. 23-კაციან განაცხადშია დებიუტანტი ალექსანდრე ჯიღაური, რომელიც 20-წლამდელთა ნაკრებიდან დაწინაურდა.

შერკინების პირველ ხაზში თამაშს დათო აბდუშელიშვილი, ირაკლი ქვათაძე და გიორგი ჩხარტიშვილი იწყებენ. მეორე ხაზში ‘სქარლეთსთან’ მატჩის მსგავსად ნოდარ ჭეიშვილი და გრიგორ ქერდიყოშვილი შეწყვილდებიან. მესამე ხაზში გიორგი კერვალიშვილს, სანდრო მამამთავრიშვილსა და ილია სპანდერაშვილს ვიხილავთ.

მგეზავ ლუკა მატკავას ნაცვლად ტრავმირებული პერანიძის ნაცვლად გიორგი მარგალიტაძე შეუწყვილდება. ცენტრში მერაბ შარიქაძისა და გიორგი კვესელაძის დუეტს ვიხილავთ, ფრთებზე სანდრო თოდუა და აკა ტაბუცაძე დადგებიან, ფულბეკი კი მირიან მოდებაძეა.

კვაჭის მარქაფაშია თენგიზ ზამთარაძე, რომელმაც 2023 წლის მსოფლიო თასზე მიღებული ტრავმა მოიშუშა. პირველ ხაზში შეცვლაზე შევლენ ბურჯები ალიკო შამილიშვილი და ნიკოლოზ ხატიაშვილი, რომელმაც ტრავმის გამო ‘გლოსტერთან’ და ‘სქარლეთსთან’ ჩელენჯ თასის თამაშები გამოტოვა, თუმცა რაგბი ევროპის სუპერ თასის ფინალში დაბრუნდა. ხატიაშვილს ჩელენჯ თასზე დებიუტი ექნება.

მეორე და მესამე ხაზში შეცვლაზე შესაბამისად დემურ ეფრემიძე და საბა კურტანიძე შევლენ. 9 ნომრის მარქაფაშია ალექსანდრე ჯიღაური, რომელმაც შარშან მსოფლიო რაგბის 20-წლამდელთა ჩემპიონატზე ითამაშა. ხაზში შეცვლაზე არიან თორნიკე კახოიძე და ლუკა ცირეკიძე.

შეგახსენებთ, თამაშს საქართველოდან ჩასული 500-მდე ქომაგი დაესწრება, რომლებსაც ემიგრანტებიც დაემატებიან და ‘შავი ლომი’ „სახლის გუნდ“ ‘კასტრთან’ თავს უცხო გარემოში არ იგრძნობს.