შემოგვიერთდით

გოგას ისევ არ უვარჯიშია - ზუროსმა ნაკრები კაუნასში მსუბუქად ავარჯიშა

3-08-2023, 13:32

Aa Aa

გაზიარება:

ლიეტუვასთან გამართული ამხანაგური მატჩის შემდეგ საქართველოს კალათბურთელთა ეროვნული ნაკრები კაუნასში დარჩა და დღეს ჟალგირისის დარბაზის მცირე დარბაზში ივარჯიშა. ილიას ზუროსმა, მანუჩარ მარკოიშვილმა და ანატოლი ბოისამ კალათბურთელების ნაწილი დაასვენა. ის მოთამაშეები, რომლებსაც ლიეტუვასთან მატჩში მოედანზე სხვებზე მეტი დროით ყოფნა მოუწიათ, მხოლოდ მოთელვებით და სროლებით შემოიფარგლნენ.

გიორგი შერმადინი, თორნიკე შენგელია და სანდრო მამუკელაშვილი მოედნის ერთ მხარეს იყვნენ და ძირითადად ფარში სროლით იყვნენ დაკავებულები. დანარჩენები კი მოედნის ნახევარზე ილიას ზუროსის მეთვალყურეობით კომბინაციებს ათამაშებდნენ. მთლიანობაში, არც დანარჩენები დატვირთულან, რადგან ლიეტუვასთან რთული თამაშის შემდეგ კალათბურთელებს ძალების აღდგენა მართებთ.

ნაკრები მომდევნო ამხანაგურისთვის ემზადება

არ უვარჯიშია გოგა ბითაძეს, რომელმაც ლიეტუვასთან მატჩი მცირე ტრავმის გამო გამოტოვა. ბითაძე მოედანზე, ბიჭებთან ერთად იყო, თუმცა სავარჯიშო ფორმის გარეშე და მხოლოდ პერიოდულად ფარში ისროდა. ვარჯიშმა დაახლოებით 1 საათი გასტანა, რის შემდეგაც ნაკრები სასტუმროში დაბრუნდა და ხვალ, რიგაში გასამგზავრებლად სამზადისს შეუდგა. საქართველოს ეროვნული ნაკრები ლატვიის დედაქალაქში ავტობუსით, 3 აგვისტოს, დილის 9 საათზე გაემგზავრება. რიგამდე გზის დაფარვას 3,5 საათი დასჭირდება.