"მზად ვარ ფედერაციის ნებისმიერი გადაწყვეტილება მივიღო", - ყაზაიშვილი აგორებულ სკანდალზე

როგორც უკვე მოგახსენეთ, ტელეკომპანია "ფორმულას" ეთერში 8 საათიანი "შაბათის ფორმულას" ანონსში, სკანდალური აუდიო-ჩანაწერი გავიდა, სადაც მთავარი მოქმედი პირები, ნოდარ ნიშნიანიძე ( ვაკო ყაზაიშვილის ცოლის ძმა) და ლადო დვალიშვილი იყვნენ.

ანონსის გასვლის დროს გადაცემის წამყვანმა, დავით ქაქაშვილმა განაცხადა, რომ ეროვნული ნაკრების ფეხბურთელებს მოკვლით ემუქრებიან და ამის მთავარი მიზეზი ვაკო ყაზაიშვილის უთამაშებლობაა.

აღნიშნულ ფაქტს სოციალურ ქსელში საქართველოს ნაკრების შემტევიც გამოეხმაურა, მის განცხადებას კი უცვლელად გთავაზობთ:

"პირველ რიგში ქართველი ფეხბურთის ქომაგებს, საქართველოს ყველა მოქალაქეს ბოდიშს ვუხდი ფაქტისთვის, რომელიც ჩემთვის ყველაზე მეტად მიუღებელია.

ფეხბურთის თამაში 7 წლის ასაკში დავიწყე. ყველამ, ვინც დღეს, ჩვენს დიდ საფეხბურთო ოჯახს წარმოადგენს იცის რამდენი შრომა ჩავდე ჩემი კარიერის შენებაში.

პირველად ნაკრებში 9 წლის წინ გამომიძახეს და ეს იყო ყველაზე მნიშვნელოვანი დღე ჩემს კარიერაში.

ეროვნული ნაკრების გარეშე ფეხბურთელის კარიერული ცხოვრება სრულფასოვანი არასოდესაა. ყველა ფეხბურთელისთვის, ყველაზე მნიშვნელოვანი და ფასეული სწორედ ნაკრებია და მეც არ ვარ გამონაკლისი.

ცხოვრებაში არავინ დამჭირვებია მინდორზე მოსახვედრად. ყველამ, ვისაც ფეხბურთი უყვარს იცის რომ ჩემს მიერ გატანილი გოლების და დაშვებული შეცდომების უკან მხოლოდ მე ვდგავარ. არავინ და არაფერი ჩემი შრომის და ფეხბურთის სიყვარულის გარდა.

ყველამ, ვინც წარმოადგენს ნაკრებს და ფედერაციას იცის, რომ ეს ჩანაწერი ყველაზე ბოლომ მოვისმინე. თქვენთვის ამ ჩანაწერში ნაკრების წევრებზე საუბრობენ და ჩემთვის მეგობრებზე. ამიტომ განსაკუთრებით მძიმე და მიუღებელია საუბრის შინაარსი ჩემთვის.

ნაკრებს აქვს ისტორიული შანსი და ამ შანსის გამოსაყენებლად ყველაფერს გავიღებ. ყველანაირ პირადულ წინააღმდეგობას გადავლახავ. ჩემთვის მთავარია არ დაზარალდეს ჩვენი დიდი საფეხბურთო ოჯახი და ამიტომ მზად ვარ მივიღო ფედერაციის ნებისმიერი გადაწყვეტილება", - წერს ყაზაიშვილი.