UG-ის მორიგი სენსაცია | ფუტსალის უმაღლეს ლიგაში სეზონის დასრულებამდე ორი ტურია

ფუტსალის უმთავრეს ლიგაში რეგულარული სეზონის დასრულებამდე 2 ტურით ადრე, ოთხეულებიდან სამეულების ვინაობა გაცხადდა. უკვე გადაწყვეტილია, რომ ნიუ ვიჟენ ჯორჯიანსი, კსუ და არმია (პოზიციებს აღარ შეიცვლიან), საჩემპიონო ფლეი ოფში იასპარეზებენ. ნახევარფინალში კსუ არმიას შეეჭიდება, ჯორჯიანსი კი ზედა კვარტეტის მეოთხეადგილოსანს, რომელიც თსუ ან პსპ იქნება. დინამო თბილისი, UG-წალენჯიხა და ბეტის თბილისი, ფლეი აუტში ორ წრედ (6-6 მატჩი) იასპარეზებენ. ამ ტრიოს მეოთხე გუნდად პსპ ან თსუ დაემატება. დარჩენილი ორი ტურის მთავარი ინტრიგა სწორედ ესაა - თსუ თუ პსპ, რომელი გუნდი შეწვდება ელიტურ კვარტეტს... მანამდე კი მე-19 ტურზე ვთქვათ, რომელშიც ორი პოკერი, ორი ჰეთ თრიკი და ოთხი დუბლი ვიხილეთ. უხვგოლიანობის მიუხედავად, ამ ტურში მშრალი ანგარიშიც დაფიქსიდა - ამ სეზონში 0:0 ანგარიში აქამდე არ ყოფილა. UG-წალენჯიხამ ზედიზედ მესამედ მოიგო და არმიასთან გამარჯვებით მორიგი სენსაციის ავტორად მოგვევლინა. დეტალური მიმოხილვისთვის, თანმიმდევრობას მივყვეთ.


ბეტის თბილისთან, დინამომ წინა ორი მატჩი მოიგო (3:1, 5:1), მაგრამ ამჯერად უფრო სოლიდურად იმარჯვა. დინამოელებმა 9 გოლი იზეიმეს. ბეტისელებმა ამას თეგა პატარაიას დუბლით უპასუხეს. დინამოდან, დავით ხუბუტიას, ალექსანდრე ცირეკიძის, კახა მაღლაკელიძისა და დემიკო ნასყიდაშვილის თითო გოლს, ერთი ავტოგოლი და მთავარ მეგოლე, ლაშა-გიორგი ობოლოძის ოთხი გატანილი ბურთი დაემატა. ამ პოკერით ობოლაძემ 21 გოლი დააგროვა და ბომბარდირთა ცხრილში, იტალო ფსილიოსა (36) და შაკო ცირამუას (25) შემდეგ მესამე ადგილზეა.


თსუ-სთან ორი გამარჯვების (4:2, 6:2) შემდეგ, ნიუ ვიჟენმა სტუდენტებთან ამჯერად ბევრად დიდი სხვაობით, 3:10 იმარჯვა. პოკერის გარეშე ამ შეხვედრასაც არ ჩაუვლია. ჯორჯიანსელთა ბრაზილიელმა ვილიან სოუზამ 4 გოლი იზეიმა, ნიკოლოზ გაბრიჩიძემ და იტალო ფსილიომ 2-2, ხოლო ვახტანგ ჯვარაშვილმა და რონინიომ თითო ბურთი გაიტანეს. ამ გოლებს, თსუ-დან ნოდარ ქურცაძემ ჰეთ თრიკით უპასუხა. ჯორჯიანსმა ზედიზედ მე-9 მატჩი მოიგო და 2 ტურით ადრე, რეგულარული სეზონის ჩემპიონობა გაიფორმა. ამ მარცხის მიუხედავად თსუ მეოთხე ადგილზე დარჩა, მაგრამ უახლოეს მდევარს მხოლოდ ქულით უსწრებს.


რეგულარულ სეზონში მეორე ადგილის დაკავებისთვის, კსუ-ს დარჩენილ მატჩებში მხოლოდ ქულის მოპოვება სჭირდებოდა. პსპ-ს შეეძლო, თსუ-ს წაგებით ესარგებლა და კავკასიელებთან მოგების შემთხვევაში, მე-4 სანატრელი ადგილი დაეკავებინა. მოკლედ, ტურის ცენტრალურ მატჩად მიჩნეულ ამ შეხვედრას, ინტრიგა არ აკლდა. დრამატიზმს წარსულიც აძლიერებდა, ამ სეზონის ურთიერთშეხვედრებში კსუ-მ და პსპ-მ თითო შეხვედრა მოიგეს. მატჩი გარდამავალი უპირატესობით წარმართა და ორივე გუნდს შეეძლო დაწინაურება, მაგრამ ორი 20-წუთიანი ტაიმი უგოლოდ გაილია. ამ ფრით კსუ-მ რეგულარულ სეზონში მეორეობა გაინაღდა, პსპ მეოთხე ადგილს ჯერჯერობით ვერ შესწვდა, მაგრამ თსუ-სთან ჩამორჩენა ქულამდე შეამცირა. საგულისხმოა ის, რომ პსპ მომდევნო ტურში სწორედ თსუ-ს დაუხვდება და შესაძლოა ამ მატჩმა მთავარ ინტრიგას პასუხი გასცეს.


UG-წალენჯიხას შეჩერება არმიამაც ვერ შეძლო. არა და, არმიელებმა UG-ს წინა ორ შეხვედრაში მოუგეს (6:3, 8:0). მე-15 ტურში ბეტისთან გამარჯვების შემდეგ, არმიამ 4 შეხვედრაში მხოლოდ ქულას გამორჩა და უცილობლად მოგება ეწადა. თამაში არმიელთა სცენარითა და მათი სწრაფი გოლით დაიწყო. პირველივე წუთზე ბაკურ ნანეიშვილმა გახსნა ანგარიში, 1:0. წალენჯიხელები თამაშის გათანაბრებას შეეცადნენ, მაგრამ ლადო ბურდულის ბიჭებმა ფორა გააორმაგეს. მე-9 წუთზე გიორგი ქურდაძის მაღალი ჩაწოდება თამაზ გოგსაძემ თავურით დააფასა, 2:1. ამან წალენჯიხელები გაახელა, მათ თამაში მეტოქის საჯარიმოში გადაიტანეს და მე-13 წუთზე ზურაბ ღვინჯილიამ გაიტანა, 2:1. სტუდენტებმა მეტად მოინდომეს და ორიოდე წუთში ანგარიშიც გაათანაბრეს, ლევან ღვინჯილიამ მეტოქეს ბურთი მოპარა და კარში მიუჩინა ადგილი, 2:2. მეორე ტაიმი ორმხრივი იერიშებით წარიმართა. სტუდენტებმა მეორე ტაიმის სტარტზე, 3-4 წუთში მოიპოვეს უპირატესობა, რაც შედეგიანი აღმოჩნდა. 28-ე წუთზე ღვინჯილიამ მეტოქის მეკარის შეცდომით ისარგებლა და UG-მ თამაში შემოაბრუნა, 2:3. არმიამ მეკარიანად შეუტია. ამის გამო წალენჯიხელებმა მეტოქე დასაჯეს და ნახევარ წუთში ჯოლოხავამაც მეორე ბურთი გაიტანა, 2:4. არმიელებმა იერიშები ხუთეულით გააგრძელეს და 35-ე წუთზე ჯოლოხავამ შორეული დარტყმით დალაშქრა მოწინააღმდეგის დაუცველი კარი და ჰეთ-თრიკი გაიფორმა, 2:5. არმიელებმა მეტოქეზე ზეწოლა გააძლიერეს, მაგრამ გიორგი სილაგაძის მხოლოდ ერთი გოლით უპასუხეს. პსპ-ს შემდეგ, UG-წალენჯიხამ, მრისხანე არმიასთან გამარჯვებაც (3:5) შეძლო და მეექვსეზე მყოფ დინამოსთან 2-ქულიანი ჩამორჩენა შეინარჩუნა.

geofutsal