ჭაბუკთა ‘ბ’ ლიგა | ‘ხვამლმა’ ჯგუფში პირველი ადგილი გაინაღდა

ჭაბუკთა ‘ბ’ ლიგის „ოქროს“ ჯგუფში, მე-2 ეტაპის მე-8 ტურის შემდეგ პირველ ჯგუფს დამაჯერებლად მოქმედი ჩემპიონი ‘ლელო’ ლიდერობს. დიდ დიღმელებმა ეტაპის 8-ვე შეხვედრა მოიგეს (ბონუსის აღება მხოლოდ 1 მატჩში ვერ მოახერხეს), 39 ქულა დააგროვეს და მდევარ ‘ბათუმს’ კვლავინდებურად 10 ქულით უსწრებენ. აჭარლებს მარაგში ‘აკადემიასთან’ გადადებული საშინაო შეხვედრა რჩებათ. „მხატვრებმა“ 19 ქულით ცხრილში მესამე პოზიცია გაიმყარეს.

‘ხარები’ 10 ქულით მე-4 ადგილზე იმყოფება და ბოლოსწინა ადგილზე მყოფ ‘ფოთს’ 3 ქულით აღემატება. კინკილა ქულის მქონე აუტსაიდერი ‘წიქარა’ კი ორივე ჯგუფის ბინადართა შორის ერთადერთი გუნდია, რომელმაც ყველა შეხვედრა მარცხით დაასრულა.

‘ლელო’-‘ფოთის’ შეხვედრა მესამე მასივის სარაგბო არენაზე გაიმართა და ჩემპიონმა კოლხებს მატჩის ბედი პირველივე ტაიმში გადაუწყვიტა. ბექა ყორიაულის ბიჭებმა შესვენებამდე 7 ლელო გაიტანეს და 45 უპასუხო ქულა აიღეს. ‘ლელოს’ მხტომელმა საბა გიორგაძემ „პოკერი“ (4 ლელო) გაიფორმა. მეორე ნახევარში მოედანზე ვნებათაღელვა აშკარად დაცხრა და მეტოქენი თითო გატანილ ლელოს დაჯერდნენ. ჩემპიონის მხრიდან ლელო შუამარბ ლუკა ჯიქიძის ანგარიშზეა. კოლხებმა „მშრალი“ ანგარიშით მარცხს თავი შუამარბ ნიკო კილაძის გარდასახული ლელოთი დააღწიეს - 52:7.

„რაგბი ჭალაში“, ‘წიქარა’-‘აკადემიას’ შეხვედრა „მხატვართა“ უპირატესობით წარიმართა. სამართლიანობისთვის უნდა აღინიშნოს, რომ აუტსაიდერი მაქსიმალურად დაიხარჯა, პირველი ნახევარი მხოლოდ 9 ქულის სხვაობით დათმო, მეორე ტაიმში კი კვაჭმა ლუკა წიკლაურმა ფავორიტს ლელოც დაუდო. „მხატვრებმა“ კი მთლიანობაში 5 ლელო გაიტანეს. მატჩის პირველი ლელოს ავტორმა ბურჯმა სანდრო კახნიაშვილმა „დუბლი“ შეასრულა. დანარჩენი ლელოები კი ფულბეკ საბა თოიძის, მღლეტელ სანდრო არობელიძისა და ფრთა სანდრო გოცირიძის ანგარიშზეა. ნიკა ჩიტალაძის ბიჭებმა შეხვედრა პრემიალური ქულით მოიგეს - 31:8.

აჭარის დედაქალაქში, ‘ბათუმი’ რუსთავის ‘ხარებთან’ უპირობო უპირატესობას ფლობდა. გელა ჭოველიძის შეგირდები უმეტესად ხელდახელ, სწრაფად, კომბინაციურ სტილში მოქმედებდნენ და ქვემო ქართლელებს 10 ლელო გაუტანეს. მატჩის პირველი ლელოს ავტორი, ბათუმელთა შუამარბი სანდრო ზაქარაძე ერთადერთი მორაგბე გამოდგა, ვინაც „დუბლი“ შეასრულა. მასპინძელთა მგეზავმა კაპიტანმა გიგი აბაშიძემ კი გატანილ ლელოსთან ერთად, 7 გარდასახვა გამოიყენა. ‘ხარები’ ბოლომდე იბრძოდა და მატჩის ბოლო წუთზე ფრთა დემე მაღრაძის გატანილი ლელოთი „მშრალი“ ანგარიშით მარცხისაგან თავის დაღწევა მოახერხა - 66:5.

‘ლელოს’ მსგავსად, მე-2 ჯგუფის ლიდერმა ‘ხვამლმაც’ 39 ქულას მოუყარა თავი და თან ჯგუფში პირველობაც ვადამდე გაინაღდა. მუხიანელები მდევარ ‘აიას’ 11 ქულით უსწრებენ. ‘არმიამ’ 24 ქულით მესამე ადგილი დაიბევა და რიონისპირელებს 4 ქულით ჩამორჩება. ‘ლოკომოტივმა’ და ‘არმაზმა’ 10-10 ქულა დააგროვეს, თუმცა უკეთესი პირისპირ ბალანსი „რკინიგზელებს“ ცხრილში მე-4 პოზიციას უნარჩუნებს. ‘აია’-2 კი 4 ქულით ჯგუფის აუტსაიდერად რჩება.

„ხვამლი არენაზე“, ჯგუფის აუტსაიდერმა ‘აია’-2-მა ფავორიტ ‘ხვამლთან’ ლელოს გატანა ვერ მოახერხა, თუმცა მუხიანელებს ჯეროვანი წინააღმდეგობა უწია. დათო ცხვედიანისა და რატი ურუშაძის შეგირდებს პრემიალური ქულით მოსაგებად ძალთა მაქსიმალური მობილიზება დაჭირდათ. ‘ხვამლმა’ რიონისპირელებს ტაიმებში 2-2 ლელო დაუდო. პირველ ნახევარში სტუმრებს ლელო ბურჯმა დათა დვალიშვილმა და ლუკა გორგოძემ გაუტანეს. მეორე ნახევარში კი თავი მარქაფადან ჩართულმა კვაჭმა ნიკა იობაშვილმა და ფრთა ნიკა ბრეგაძემ გამოჩინეს. ქუთათურთა მეორე გუნდმა სამატჩო ქულები პირველ ტაიმში ფულბეკ გიორგი ხუჯაძის გატანილი ერთადერთი ჯარიმით აიღო - 22:3.

„აია არენაზე“, ვიცე-ჩემპიონი ‘აია’ მარნეულის ‘არმაზს’ დაუხვდა.პირველ ტაიმში ქვემო ქართლელებმა მასპინძლებს ტოლი არ დაუდეს და კვაჭ გიორგი დევაძის გატანილი ლელოთი შესვენების წინ ფავორიტი მხოლოდ 2 ქულიან უპირატესობას დააჯერეს.

მეორე ტაიმში ‘აიამ’ ტემპს უმატა, მეტოქეზე წნეხი გააძლიერა და საწადელსაც მიაღწია. რიონისპირელებმა მთლიანობაში ქვემო ქართლელებზე 3-ით მეტი ლელო გაიტანეს. ‘აიას’ ფულბეკმა მათე ბებიამ „დუბლი“ შეასრულა, თითო გატანილი ლელო კი აქტივში ჰავბეკმა გიორგი ჭაჭიაშვილმა და შუამარბმა ლუკა მუშკუდიანმა მიითვლალეს. ამის გარდა, მოლის მრავალჯერადი ჩაქცევისთვის მსაჯმა რიონისპირელთა სასარგებლოდ ტექნიკური ლელო დანიშნა. ‘აიამ’ მატჩი პრემიალური ქულით მოიგო - 31:18.

‘არმია’-‘ლოკომოტივის’ დედაქალაქურ დერბი, მხარეთა შეთანხმებით „რკინიგზელთა“ ბაზაზე გაიმართა. „არმიელთა“ დომინაცია მატჩის პირველივე წუთებიდან საგრძნობი გახდა. ‘არმიამ’ მეტოქეს მთლიანობაში 6-ით მეტი, 8 ლელო დაუდო და ყველა მათგანი სხვადასხვა მორაგბის ანგარიშზეა. ‘არმიას’ წარმატებას სათავე ფრთა იოანე სებისკვერაძის გატანილმა ლელომ დაუდო, წერტილი კი მარქაფადან ჩართული კიდევ ერთი ფრთის მოთამაშის დავით ნებიერიძის დადებულმა ლელომ დაუსვა. ‘არმიამ’ მატჩი პრემიალური ქულით მოიგო - 46:12.

rugby.ge