ჩაბი ალონსომ ფლორენტინო პერესს 3 ტრანსფერი მოთხოვა

უკვე გადაწყვეტილი ამბავია, რომ ჩაბი ალონსო მიმდინარე სეზონის შემდეგ „ბაიერ ლევერკუზენს“ დაემშვიდობება და მადრიდის „რეალს“ მთავარი მწვრთნელის რანგში ჩაუდგება სათავეში.

ცნობილი იტალიელი ინსაიდერი, ფაბრიციო რომანო იუწყება, რომ ალონსომ უკვე გადაუგზავნა ფლორენტინო პერესს – „ბლანკოსის“ პრეზიდენტს – სამი კონკრეტული პოზიციის გაძლიერების მოთხოვნა. საუბარია ახალ მარცხენა მცველზე, ცენტრალურ მცველსა და ცენტრში მყოფ ნახევარმცველზე.

მნიშვნელოვანი დეტალია ისიც, რომ ალონსოს სურვილია, ყველა ეს ტრანსფერი 2025 წლის მსოფლიო საკლუბო ჩემპიონატის დაწყებამდე განხორციელდეს. ამჟამად „რეალს“ არაერთი მოთამაშე ჰყავს ტრავმირებული, რაც ზაფხულში დაგეგმილი პრესტიჟული ტურნირისთვის მოსამზადებელ პერიოდს კიდევ უფრო მნიშვნელოვანს ხდის.

აღსანიშნავია, რომ 2025 წლის კლუბებს შორის მსოფლიო ჩემპიონატი ახალი, განახლებული ფორმატით გაიმართება. შეჯიბრება აშშ-ში, ივნისსა და ივლისში ჩატარდება და მასში 32 გუნდი მიიღებს მონაწილეობას. ევროპას ტურნირზე 12 წარმომადგენელი ეყოლება, სამხრეთ ამერიკას – 6, ჩრდილოეთ და ცენტრალურ ამერიკას – ასევე 6, აზიას – 5, აფრიკას – 2, ხოლო ოკეანეთიდან მხოლოდ ერთი კლუბი მიიღებს მონაწილეობას.

ტურნირის გამარჯვებული კი არა მხოლოდ დიდ სპორტულ პრესტიჟს, არამედ 100 მილიონი ევროს ოდენობის ფულად პრიზს მიიღებს.

ალონსოს „რეალში“ დაბრუნება მწვრთნელის რანგში დიდი ინტერესის საგანია და მის პირველ ნაბიჯებს, განსაკუთრებით სატრანსფერო ბაზარზე, გულშემატკივრები და ანალიტიკოსები განსაკუთრებული ყურადღებით დააკვირდებიან.