ქართული რაგბის ისტორიაში ახალი სიტყვა ითქვა » SPORTLINE.GE - სპორტის ხაზი

ქართული რაგბის ისტორიაში ახალი სიტყვა ითქვა

ქართული რაგბის ისტორიაში ახალი სიტყვა ითქვა
28-05-2021, 13:26
Aa Aa
გაზიარება:

პირველად ქართული რაგბის ისტორიაში უმნიშვნელოვანესი რამ მოხდა. ინფრომაციას საქართველოს რაგბის კავშირი ავრცელებს.

რაგბის ევროპის მიერ დაორგანიზებულ ტურნირს, რაგბი 7, ორი ქართველი რეფერი იმსაჯებს. სულხან ჩიხლაძე და ანა პოღოსიანი, ხორვატიაში, ზაგრებში, გასამართ ქალთა და კაცთა "ალაფას"( 19-20 ივნისი) იმსაჯებენ.

7-კაცა რაგბის ევროპის „ალაფაზე“ 12 გუნდი ითამაშებს – რუმინეთი, უკრაინა, ბელგია, შვედეთი, ჩეხეთი, ხორვატია, ისრაელი, ლუქსემბურგი, დანია, თურქეთი, უნგრეთი და ლატვია.

ჩიხლაძეს რაგბი ევროპის ტურნირებზე 15-კაცა რაგბში გვერდით მსაჯად და ვიდეო-რეფერად (წელს რუმინეთი-ესპანეთი) რამდენჯერმე უმუშავია, 7-კაცას ტურნირზე და თანაც მოედნის მსაჯად კი, პირველად მიიწვიეს.

"დასაწყისისთვის ძალიან კარგი ტურნირია. ჩემი ფიზიკური კონდიციებიდან გამომდინარე, ყოველთვის მქონდა სურვილი, რომ 7-კაცა რაგბში მოვხვედრილიყავი და ახლა ამის შესაძლებლობა მეძლევა. მოწვევის მიღებისთანავე დავიწყე სპეციფიური მზადება ჩვენს ნაკრებთან ერთად, ვცვლით ინფორმაციებს და ვიმედოვნებ, რომ ზაგრების შემდეგ უფრო მაღალი დონის 7-კაცა ტურნირებზეც მიმიწვევენ."

ზაგრებშივე, 19-20 ივნისს იმართება 7-ქალა რაგბის ევროპის „ალაფაც“, სადაც ქართველი გოგონებიც ითამაშებენ. ჩვენი გუნდი ბ ჯგუფში ჩეხეთის, ფინეთის, უნგრეთისა და დანიის ნაკრებებთან მოხვდა, ხოლო ა ჯგუფში უკრაინა, შვედეთი, ნორვეგია, თურქეთი და მოლდოვა ითამაშებენ.

ანა პოღოსიანს, ნინო ელოშვილთან ერთად, 7-ქალას ტურნირზე გვერდით მსაჯად უკვე უმუშავია, ახლა კი ცენტრში მოუწევს საკუთარი უნარების წარმოჩენა:

"ამ ტურნირზე მიწვევის შესახებ შარშანაც იყო საუბარი, მაგრამ მაშინ კოვიდ-პანდემიამ ამის საშუალება არ მომცა და მოხარული ვარ, რომ წელსაც მოვხვდი ორგანიზატორების თვალთახედვის არეში. ჩემთვის ეს პირველი ნაბიჯია ახალ ეტაპზე. ხორვატიაში დამკვირვებლებიც იქნებიან და ვიმედოვნებ, რომ სამომავლოდ კვლავ მექნება 7-ქალას ტურნირებზე მიწვევა. საქმეს ისიც გამიიოლებს, რომ ზაგრებში ჩვენი ნაკრებიც ითამაშებს და მარტო არ ვიქნები წარმოდგენილი. დარწმუნებული ვარ ჩვენი გოგონებიც წარმატებით ითამაშებენ და ჩემი მსაჯობითაც კმაყოფილი დარჩებიან ორგანიზატორები."

შეგახსენებთ, 5-6 ივნისს საქართველოს 7-კაცა ნაკრები რაგბი ევროპის ჩემპიონატის პირველ ეტაპზე პორტუგალიაში, ლისაბონში ითამაშებს. ა ჯგუფში მათი მეტოქეები გერმანიის, პორტუგალიისა და ლიეტუვის გუნდები იქნებიან.

კომენტარის დამატება
კოდის განახლება
ინფორმაცია
ჯგუფ სტუმარი-ის წევრებს არ აქვთ კომენტარის დატოვების უფლება.


დღის ხაზი