როგორც იცით, უახლოეს პერიოდში ნაპოლი და მილანი ერთმანეთს 3-ჯერ შეხვდებიან, აქედან ერთხელ სერია A-ში, ორჯერ კი ჩემპიონთა ლიგის ეგიდით.
სწორედ ამის შესახებ ჩაწერა MEDIASET-თან ინტერვიუ მილანის გამოცდილმა მცველმა, ალესანდრო ფლორენციმ, რომელმაც აღნიშნა, რომ დაუმარცხებელი საერთოდ არავინაა, მათ შორის ნაპოლიც:
"მათთან მატჩები არც ისე იოლი იქნება, თუმცა, ჩემი აზრით, მილანთან დაპირისპირებით კმაყოფილები არც ისინი იქნებიან, განსაკუთრებით ჩემპიონთა ლიგაში, ამას ჩვენი ისტორიიდან გამომდინარე ვამბობ. ამ ტურნირზე ჩვენ ორიდან ერთ-ერთი ნახევარფინალში გავა, ეს კი ქვეყნისთვის დიდი მიღწევა იქნება, რადგან იტალიური კლუბი 1/2 ფინალში დაბრუნდება. ვფიქრობ, დაუმარცხებელი არავინაა, მათ შორის ნაპოლიც."
ამის შემდეგ, ფლორენციმ ყურადღება ხვიჩა კვარაცხელიას ფაქტორზე გაამახვილა: "ის ძალიან მაგარი ფეხბურთელია, რომელსაც შეუძლია, რომ შეხვედრაში განსხვავება შექმნას. მიუხედავად ამისა, ჩვენი მთელი ყურადღება ნაპოლის გუნდურად შეჩერებაზე იქნება და რომელიმე კონკრეტული ფეხბურთელი მიზანში ამოღებული არ გვყავს." - თქვა ალესანდრომ
შეგახსენებთ, რომ ნაპოლი და მილანი სერია A-ში კვირას ითამაშებენ. ეს შეხვედრა ჩვენი დროით 22:45-ზე დაიწყება.