ინგლისმა ბრიტანული დაპირისპირება მოიგო - ამერიკა და სამი ლომი მომდევნო ეტაპზე არიან

რამდენიმე წუთის წინ დასრულდა B ჯგუფის ჯგუფური ეტაპის მესამე ტურის შეხვედრები, რითაც საბოლოოდ გავარკვიეთ კიდევ ორი ნაკრები, რომელიც მსოფლიო ჩემპიონატის 1/8 ფინალში ითამაშებს.

პირველი ინგლისის ეროვნული ნაკრებია, რომელმაც ბრიტანულ დაპირისპირებაში უელსს 3:0 მოუგო და ჯგუფი პირველი ადგილით დაასრულა. პირველ ნახევარში ინგლისი აქტიურად უტევდა უელსს, თუმცა გოლის გატანას ვერ ახერხებდა. მეორე ნახევარში განსხვავებული 'სამი ლომი' ვიხილეთ, რომელმაც მეტოქეზე ზეწოლა უფრო გაზარდა და უელსის საჯარიმოში არაერთი სახიფათო მომენტიც შექმნა.

ამ შეხვედრაში ულამაზესი ჯარიმიდან ანგარიში მარკუს რაშფორდმა გახსნა. გატანილი გოლის შემდეგ 'სამი ლომი' უფრო გააქტიურდა, რასაც მალევე მეორე გოლი მოჰყვა ფილ ფოდენის შესრულებით. მატჩის საბოლოო ანგარიში კი მარკუს რეშფორდმა დააფიქსირა, რომელმაც მიმდინარე მსოფლიო ჩემპიონატზე მესამე გოლი გაიტანა და ბომბარდირთა დავაში კილიამ მბაპესა და ენერ ვალენსიას გაუთანაბრდა. ინგლისი 1/8 ფინალში სენეგალს დაუპირისპირდება, რომელმაც თავის მხრივ ეკვადორი დაამარცხა.