ხვალ, საქართველოს რაგბის ეროვნული ნაკრები 18:00 საათზე ურუგვაის ამხანაგურ მატჩში დინამო არენაზე დაუპირისპირდება.
2022 წლის ნოემბრის სატესტო მატჩებს საქართველოს სარაგბო ნაკრები 7 დებიუტანტით შეხვდება. როგორც იცით, ეროვნულ გუნდს სხვადასხვა მიზეზებით რამდენიმე მოთამაშე დააკლდება, რის გამოც მწვრთნელებმა მსოფლიოს თასამდე 1 წლით ადრე ახალ მორაგბეებს უხმეს.
"აი, რას ამბობს საქართველოს ნაკრების მთავარი მწვრთნელი მოახლოებულ შეხვედრებთან დაკავშირებით: „სამწუხაროა, მაგრამ ვერაფერს შევცვლით. მწვრთნელის ხვედრი ასეთია და ყოველთვის მზად უნდა ვიყოთ იმისათვის, რომ რაღაც ეტაპზე ესა თუ ის მოთამაშე დაგვაკლდება. სწორედ ამისთვის გვინდა სიღრმეების გაჩენა და სანაკრებო სივრცეში ახალი მოთამაშეების შემოყვანა."
„ნოემბერში ძლიერი მეტოქეები და საინტერესო თამაშები გველოდება. საწყენია, რომ ორი ძირითადი ბურჯი დაგვაკლდება – ლუკა ჯაფარიძე და ბექა გიგაშვილი. პირველს ტრავმა აქვს და ოპერაცია გაიკეთა, ხოლო მეორე ოჯახური პრობლემების გამო ვერ ჩამოდის. ბექას არასდროს ჰქონია ნაკრებში ჩამოსვლასთან დაკავშირებით პრობლემა და მისი სიტუაცია ჩვენთვის აბსოლუტურად გასაგებია. ასევე ტრავმირებულია ბურჯი ნიკა ხატიაშვილი, მეორე ხაზში გრიგორ ქერდიყოშვილი და მესამეში გიორგი ცუცქირიძე, რომელიც მოედანზე 2-3 კვირაში დაბრუნდება. დისკვალიფიკაციის გამო არ გვეყოლება გელა აფრასიძე, რომელიც ჩვენთვის დიდ ძალას წარმოადგენს. ტრავმირებულია კიდევ ერთი 9 ნომერი მიშიკო ალანია, ასევე სოსო მათიაშვილი და თორნიკე კახოიძე“.