5 სავარაუდო მწვრთნელი, რომელიც "რეალს" ჩაიბარებს » SPORTLINE.GE - სპორტის ხაზი

5 სავარაუდო მწვრთნელი, რომელიც "რეალს" ჩაიბარებს

5 სავარაუდო მწვრთნელი, რომელიც "რეალს" ჩაიბარებს
28-05-2021, 00:42
Aa Aa
გაზიარება:

როგორც იცით, 1 დღის წინ მადრიდის "რეალის" მთავარმა მწვრთნელმა, ზინედინ ზიდანმა კლუბის დატოვების გადაწყვეტილება ოფიციალურად გაანდო მსოფლიოს.

შემთხვევა, რომელიც ალბათ თავად "ლოს ბლანკოსის" გულშემატკივრებისთვისაც კი მოსალოდნელი იყო, "რეალის" ხელმძღვანელობასაც ჰქონდა გათვალისწინებული, რის გამოც ესპანელმა პრეზიდენტმა, ფლორენტინო პერესმა, რამდენიმე თვის წინ უკვე დაიწყო ზიზუს შემცვლელთა ძიება.

ცნობების მიხედვით, ამჟამად სამეფო გრანდის სატრანსფერო რადარზე ის 5 დასაქმებული და უმუშევარი სპეციალისტი იმყოფება, რომელთა დადებით და უარყოფით მხარეებს ქვემოთ გაეცნობით:

1. ანტონიო კონტე 

დადებითი: ძლიერი და ქარიზმატული ლიდერი

ყველასათვისაა ცნობილი, რომ კონტე საკუთარ კოლეგებს შორის ყველაზე მეტად, არა უმაღლესი კლასის ტაქტიკური განსწავლულობით, არამედ გასახდელში მაღალი პატივისცემით, მოტივირების უნარით, ბრძოლისუნარიანობითა და ქარიზმით გამოირჩევა, რაც მოთამაშეებს წარმატებისკენ მომართავს. ცხადია, რომ 10 წლის შემდეგ უტიტულოდ დარჩენილი "რეალის" ფეხბურთელებისთვის სწორედ ასეთი თავკაცი იქნება ეფექტური.

უარყოფითი: გასახდელში კონტეს მიმართ განწყობა

"პატივისცემას მოპოვება სჭირდება, მას არავინ გაჩუქებს" - ეს სიტყვები "რეალის" ესპანელ კაპიტანსა და ცენტრალურ მცველს, სერხიო რამოსს ეკუთვნის, რომელმაც ასეთი განცხადება რამდენიმე წლის წინ, კონტეს მადრიდში შესაძლო გადმობარგებაზე გააკეთა. აქედან გამომდინარე, იტალიელს მოსვლის შემთხვევაში, ეგოების სერიოზულ ჭიდილში ჩართვა მოუწევს.

2. მაურისიო პოჩეტინო

დადებითი: ძველი "მეგობარი"

"ჩემი მტერის მტერი ჩემი მეგობარიაო" ალბათ ზუსტად და ანალოგიურად ასახავს ერთ დროს კატალონიის "ბარსელონას" თანაქალაქელის, "ესპანიოლის" მწვრთნელის, მაურისიო პოჩეტინოსა და მადრიდის "რეალის" დამოკიდებულებას. არგენტინელ თავკაცს არაერთხელ გამოუთქვამს მადრიდული გრანდის ხელმძღვანელობის სურვილი, მას პრემიერ ლიგასა და ლა ლიგაში დიდი გამოცდილება დაუგროვდა და "პსჟ-სთან" ერთად, ვარსკვლავებთან მუშაობაც ისწავლა, რაც "რეალის" ნებისმიერმა მწვრთნელმა უნდა იცოდეს.

უარყოფითი: დაკარგული ხელწერა


პოჩეტინოს როგორი დიდი გულშემატკივრობაც არ უნდა ვცადოთ, ერთი ფაქტი საჭიროა ვაღიაროთ, არსებობდა რეალური მიზეზი იმისა თუ რატომ გადაწყვიტა "ტოტენჰემის" პრეზიდენტმა, დენიელ ლივიმ, მისი კლუბიდან გაშვება. მაურისიომ გასახდელის კონტროლი დაკარგა, მოთამაშეების მოტივირებას ვეღარ ახერხებდა, ტაქტიკურად ის თითქმის ყველა სპეციალისტმა გამოიცნო და იმავეს ვხედავთ პარიზშიც, სადაც მან ფრანგულ კლუბს, ლიგა 1-ის მოგებაშიც კი ვერ შეუწყო ხელი. ბუნებრივია ასეთი ტიპის მწვრთნელის დანიშვნამდე პერესს სერიოზული ფიქრი მოუწევს.

3. ჩაბი ალონსო

დადებითი: "რომანტიკული" დაბრუნება

ალბათ არ არსებობს "რეალის" ისეთი გულშემატკივარი, რომელიც კლუბში ყოფილი ლეგენდის დაბრუნებას არ ისურვებდა, განსაკუთრებით მაშინ, როდესაც ხელმძღვანელის პოზიციაზე ზიდანის მოსვლამ მათ ზედიზედ 3 ჩემპიონთა ლიგის ტიტული მოუპოვა. ალონსოს სამწვრთნელო კარიერა ბრწყინვალედ დაიწყო, "რეალ სოსიედად B-ს" რიგებში მან პლეი-ოფების შემდეგ, ლა ლიგის მე-2 დივიზიონშიც კი ამოაღწია, რაც ახალგაზრდული გუნდისთვის არაჩვეულებრივი შედეგია. ჩაბის დომინანტური თამაშის სტილი შესაძლოა ის იყოს, რაც ახლა "რეალს" აკლია.

უარყოფითი: გამოცდილების ნაკლებობა

მართალია ზიდანის არგუმენტი ალონსოს დანიშვნის გასამართლებლად შეგვიძლია გამოვიყენოთ, თუმცა ნუ დავივიწყებთ, რომ საქმე განუმეორებელ ზიდანთან გვაქვს და იმის განმეორება, რაც მან ამ წლების განმავლობაში მოახერხა, ყველა გამოუცდელი მწვრთნელისთვის შეუძლებელია. რა თქმა უნდა გარკვეული დროისა და გამოცდილების შემდეგ ალონსოსთვის "რეალის" კარი ღია უნდა იყოს, თუმცა მისი "დიდ სცენაზე" გამოჩენა ჯერ-ჯერობით ნაადრევია.

4. რაული

დადებითი: ბუნებრივი შემცვლელი

ზიდანი მწვრთნელის პოზიციაზე სწორედ ახალგაზრდული გუნდის, "კასტილიას" ხელმძღვანელის თანამდებობიდან დააწინაურეს. ამჟამად კი "რეალის" მომავალი ვარსკვლავები, სწორედ ლეგენდარული ესპანელი თავდამსხმელის, რაულ გონსალელის ხელში "იზრდებიან". დადებითი პიროვნება და კლუბის ლეგენდა, რომელმაც ზუსტად იცის ახალგაზრდა მოთამაშეთა უნარ-ჩვევები და გუნდის სტრუქტურა, წარმატებული სპეციალისტის ფორმულას მოგვაგონებს.

უარყოფითი: "რეალის" ხელმძღვანელობის დამოკიდებულება

სამწუხაროდ თუ საბედნიეროდ, ფლორენტინო პერესი, რაულს "რეალის" მწვრთნელის პოზიციაზე ამჟამად საერთოდ არ განიხილავს. გავრცელებული ინფორმაციის თანახმად, მას ყოფილი შემტევის ტაქტიკებში ეჭვი შეაქვს და მიუხედავად იმისა, რომ გონსალესმა "კასტილიასთან" ერთად UEFA-ს ახალგაზრდული ლიგა მოიგო, ახალგაზრდა მწვრთნელს იმ ძლიერი ხასიათის მქონე ადამიანად არ მოიაზრებს, რომელიც "რეალის" გასახდელს გაუმკლავდება.

5. კარლო ანჩელოტი

დადებითი: გამოცდილება და წარმატების ფორმულა

"პაპა კარლო" არის სწორედ ის, ვისაც ამჟამად პერესი ეძებს. უმაღლესს დონეზე გამოცდილების მქონე, ევროპული ტურნირების ტიტულების მფლობელი, ძლიერი ხასიათის მქონე პიროვნება და ტაქტიკურად ევროპაში ერთ-ერთი საუკეთესო სპეციალისტი. ამას ემატება წარსულში "რეალთან" ერთად მიღწეული წარმატება და ჩემპიონთა ლიგის 12 წლიანი პაუზის შემდეგ პირველად მოგება. მეტიც, ბევრის აზრით, ანჩელოტის 2014/15 წლების სეზონში ლიგის 1/2 ფინალში "იუვენტუსთან" მარცხის შემდეგ გაშვება, გაუმართლებელი იყო, ამიტომაც ანჩელოტი ერთ-ერთ ყველაზე რეალურ კანდიდატად გვევლინება.

უარყოფითი: ანჩელოტის დაბრუნების სურვილი

რა უნდა შესთავაზოს "რეალმა" ანჩელოტის ისეთი, რაც მას ან აქამდე არ ჰქონია ან არ უნახავს. იტალიელი სპეციალისტი ახლა მისთვის განსხვავებულ ამპლუაში, მერსესაიდული "ევერტონის" სახით, ახალგაზრდა ძლიერი კლუბის აშენების პროცესში იმყოფება, ამიტომაც შესაძლოა კვლავ გრანდის წნეხურ ატმოსფეროსა და მედიის გამუდმებული ყურადღების ქვეშ მოქცევა, მწვრთნელის ინტერესებში აღარ შედიოდეს.

იქნება თუ არა ამ 5 კანდიდატიდან რომელიმე მომდევნო სეზონში "რეალის" მწვრთნელი ეს ჯერ კიდევ საკითხავია, თუმცა ერთი რამ უეჭველია, "ლოს ბლანკოსის" შემდეგ თავკაცს წინ უდიდესი გამოწვევა ელის.

კომენტარის დამატება
კოდის განახლება
ინფორმაცია
ჯგუფ სტუმარი-ის წევრებს არ აქვთ კომენტარის დატოვების უფლება.


დღის ხაზი